إشلونكُم أَهلي / بقلم الشاعر فاضل صَبّار البياتي  السويد

إشلونكُم أَهلي الحَبايبْ بالعراق
آني أخصكم بالمحبه وبالسلام
آخ يالصوت ألشَجي والبَعيد والحزين 
من يناديني بحنينٍ وبهيام…
وَانته يلّلي، تدري أنته منهو أنته..
لَمَنْ أتذَكّرعِشِگنه
إيضِيع من عندي الكلام
إشلونك عيوني حَبيبي 
كيف أحوالك… تمام؟
*
بالمَنافي
ماتسليني الأغاني ولا قناديل الشوارع
ماتشكّلّي إهتمام
صارت الغربة عناوين ومطارات وألآم وصَبر.
وكل رسايلكم مواجع
أدري مكتوبه بدمع مو بحروف وحِبر
تسأل شلونك عيوني كيف أحوالك تمام. 
والمنافي تظل أوهام 
أوسَراب..
تبقه ظمأنه المنافي 
كيف يرويهه سؤالٍ، مِثل گطره مِن مُطر
أبرساله لو خطاب
يسأل، إشلونك عيوني كيف أحوالك تمام!
لاتعاتبني وَأعاتِبْ..
تًبقه عَطشانه غُربتي مايكفيهه سَلامٍ لو كلام
وحشه، وين ماوجهي إيتلفّت
چَنّي مو بين البَشر 
چَنّي ساكن إبيَباب 
مو أبلِبّ الزحام
وبحَشِد صاخِب 
وصَدى صوتك من بَعيد يملي روحي ودنياي العَجيبة بالعِطر
أسمع أتگُلي حَبيبي ماكو داعي للتجافي
كيف أحوالك… تمام؟
لاتعاتبني وَأعاتِبْ
دونكم شفنه العذاب 
گُلي شيفيد العتاب!
إسنيّن ضاعت بالمَهبْ
مابين توديع وقُرُب
بَعَد ميفيد العِتاب 
كلشي هاجرني وهجرته
حتى ضِحكي الچان صاحِب
عَبّس أبنُص الدرب. 
*
إشلونكُم أَهلي الحَبايبْ بالعراگ
ماكو مُهجه ولاگلُبْ
يتحمّل بَعد ضيم الفراگ
كافي هجره يلحَبايبْ 
لو أوَدّع وآني ببلادٍ بعيدة
كل مشاريع العمر والأيام
لو نجد حلٍ سعيد للمتاعِب
ونتلاگه بعد مُرّ الغياب 
ويرجع ألعِشِگ القديم أبسلام وبوئامٍ
إشلونكُم أَهلي الحَبايبْ بالعراق 
كيف أحوالك
م… تمام؟

 

عن محمد صوالحة

من مواليد ديرعلا ( الصوالحة) صدر له : كتاب مذكرات مجنون في مدن مجنونة عام 2018 كتاب كلمات مبتورة عام 2019 مؤسس ورئيس تحرير موقع آفاق حرة الثقافي .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: Content is protected !!