رثاء شخصى / شعر : الشاعر المصري أيمن اسماعيل

انا الحلم اللى عاش مره
وفى المره حلف مايعش
انا بينكم صحيح لكن
جوايا كل شئ ساكن
كما الشجره
تشوفها واقفه
كده صلبه
مع ان جدورها
جدور دايبه
ولا ليها ولا نبته
انا ايامى بتعدى
ولا هاخد ولا هادى
تشوفنى عيونى مبتسمه
ومن جوايا مقسوم
ميت قسمه
والقسمه اعانى
واعافر
واعيش بينكم
صوت بيعلا
ع الفاضى
وضحكه ع الوش ترسمنى
تقولوا سعيد ومتهنى
واد شقى كده جنى
وانا اضحك واغنى
لكن من جوه متقطع
واهى ماشيه
وانا ماشى
ومين فينا هايخلد
انا راضى كده بحالى
وترحالى
ورحيلى حاسه بيقرب
فمن قلبى سامحونى
وانا مسامح
وفى الذكرى حطولى
كلمه ومعاها لو صوره
اكون بينكم
وقوله كان بينا
وكان منا
ولا عمره مره زعلنا
ولا هنا ولا خنا
لكن هو اللى مكتوبله
يفارقنا
فى الدنيا ماليش ذكرى
غير كلمه حلوه وياكوا
وصحبه منكوا فكرنى
وهاينسوا
بس خلونى فى الذكرى
لو مر يوم فى خاطركوا
موقف او كلمه جمعتنا
انا دلوقتى بنعينى
وانتوا بكره تنعونى
وتملوا دفاتركوا برثائى
بس افتكروا سامحونى
وادعولى
يمكن دعوه تشفع لى

عن محمد صوالحة

من مواليد ديرعلا ( الصوالحة) صدر له : كتاب مذكرات مجنون في مدن مجنونة عام 2018 كتاب كلمات مبتورة عام 2019 مؤسس ورئيس تحرير موقع آفاق حرة الثقافي .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: Content is protected !!
%d مدونون معجبون بهذه: