أخبار عاجلة
الرئيسية / رواق الشعر عامي / مش عتاب/ شعر الشاعر المصري محمد ابو العبادى

مش عتاب/ شعر الشاعر المصري محمد ابو العبادى

كل كلمه من كلامي
مش ملامه
مش عتاب
د اللي كان رابط قلوبنا
داق معاكي الإغتراب
من جحود قلبِك وغدرك
والبلاده اللي ف مشاعرك
من جحودك
من غرورك
كل ثانيه بيعلا سورك
لمّا أجمل شئ ما بنّا
حس طعم الإكتئاب
كل كلمه من كلامي
مش ملامه
مش عتاب
د الغرام من بدري غاب
أصله كان من يم قلبي
من طرف واحد وذنبي
إنّي مُخلص
والوفاء عنواني دايما
أمّا قلبك ..
كان أناني
تضحكي من جوّه روحك
عز قلبي ما كان يعاني
كنتي تبقي معايا لكن
بصّه ناحية حد تاني
حد تالت
حد رابع
حد ألف
كل لحظه دق قلبك
ع الجميع لازم يلف
يا حبيبتي بجد أسف
قلبي م اللحظه دي خف
من غرامك
من خيانتك
من عذابي
م النهارده قفلت بابي
ح احضن الفاضل ف قلبي
واسترد سنين شبابي
إنما مع دنيا تانيه
دنيا أبعد من عينيكي
دنيتي ما بقيتش ليكي
قلبي مش لعبه ف إيديكي
بعد إحساسي اللي عشته
لما دوقت الطعنه مِنّك
قلبي ملكي م النهارده
مش ح يبقى تاني مِلكك
داللي طب أسير ف فخّك
إنتفض م الأسر سافر
برّه كونك للبراح
م النهارده مافيش جراح
أو تعاسه
أو أهات
م النهارده السقّا مات
يعني وردك بكره يدبل
يعني قلبك بكره يندم
ع اللي فات م الذكريات
د اللي كان أبيض ما بنّا
من إيدين الغدر ..
مات

عن محمد صوالحة

من مواليد ديرعلا ( الصوالحة) صدر له : كتاب مذكرات مجنون في مدن مجنونة عام 2018 كتاب كلمات مبتورة عام 2019 مؤسس ورئيس تحرير موقع آفاق حرة الثقافي .

اضف رد

لن يتم نشر البريد الإلكتروني . الحقول المطلوبة مشار لها بـ *

*

error: Content is protected !!
%d مدونون معجبون بهذه: