ساعات/ شعرالشاعر المصري عادل أمين

ساعات
أقوم الصبــــح من نومي
أشوفك قاعده فى الصاله
ماصبحشي ..مااسلمشي
أبوسك واجري ع الحمام
أخد لي دش وبــــــسرعه
أفوق وارجع على الصاله
ألاقيكي
قاعده تقلبي البوسه
وبتقولي صحيح مجنون
وفرحانه .. ياننوسه
بورده طارحه فى خدودك
مكان بوستي .. كإنه العيد
ومحتاره ..
دا شكله لف له سيجاره
او ناسي حبته الريفو
كما عادته مابلش ريق
رمى البوسه وراح لبعيد ؟
وسابلي الدوخه والأباريق
آااااااااااااهين .. ياعنيد
اشوف البسمه فى عنيكي
نص فرنك م الفضه
وصبح لفجره يتوضى
بيدعــــيلي ويتهــــجى
ابوسك تاني واتـــمطع
وأرمي كل كسل الليل
أمد دراااااااااااعي فوق ويمين
وفى الآخر الاقـــيكي
واقـفـه مسبـــله عــنيكي
اقولك .. يلا عايز افطر
تبوسينى ..
بدمـــــعة فرحـــه بــتــبـلل ..
جفون عيني
صحيـــــح فرحان انا بيكي
وبوجـــــودك انا فــــرحان
صباح الخير
تغيبي شويه فى المطــــبخ
وانا اتنرفز..اقول يا فطار
وما ترديش …
أجيلك جوه عايز اكـــــلك
ألاقي بسمتك شكـــــــــلك
بتضحكلك.. أزعــــق لك
ومن تــــــاني ألاقـــــيني
أسير حضنك
تهمي وتهمسي فى ودني
بحبك موت ..واحبك صوت
واحبك وانت نبع حنان
واحبك وانت متعصب
واحبك وانت متـنصَّب
على قلبي كما القبطان
عجيبه انتي
تقولى كلاااااااااااااااام
يسد النفس
أنا جـــــــوعي بيقــــتلني
وواقــــفه تكلـــمي نفــسك
وف الآخـــر حضنـتـيـني
ادي اللى بناخده من حبك
بنـــاخد الحلــو قبل الأكل
ولو فيه صـــد من عندك
حكون عارف …
ده كلــــه دلال
ما هم بيقولو فى الأمـثال
ومن عنده فى بيته القرد
أكيد عارف ألآعيــــــبه
وأنا حبي كبير ليــــكي
ولكن برضه من عيـبه
بيعرف يقــرا أي كلام
كتبتيه انتى بعـــنيكي
وتيجي البسمه من تاني
ما انا برضه كمان مش سهل
بحس بفرحتك ع المهل
هي كمان بتلــــــــقاني
اكيد مش سهل أنا ف حــبك
أنا شلة خيوط عـــمرك
بتتــكعبل كــــــتير منك
تــكـُـرْ تكوني مشغوله
تفكي بعضها من بعض
ولو لفــيتى كل الأرض
حا يفضل خيطي مشبوك لك
صباح الخير
صباح الخير
صباح العشره ياعمري

عن محمد صوالحة

من مواليد ديرعلا ( الصوالحة) صدر له : كتاب مذكرات مجنون في مدن مجنونة عام 2018 كتاب كلمات مبتورة عام 2019 مؤسس ورئيس تحرير موقع آفاق حرة الثقافي .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: Content is protected !!