انتو مين؟
يا للى عيونكم ميتين
بالضباب و الدمار متلتمين
ليه بقيتوا لدمنا عطشانين؟
طنطا منيا اسكندرية لسة مين؟
كل يوم دم و خراب هو مين؟
آمر بقتل المظلومين
مسيحى مسلم هو مصرى
مصر دى للمصريين
قالها رسولنا جند مصر
فى رباط ليوم الدين
أحمد و مينا حتة واحدة
مش حتتين
قلب واحد ، نبض واحد
دقة واحدة مش دقتين
هى دى مصر الحبيبة
دول ولادها الطيبين
قولى إنت تبقى مين؟
مش صحيح من دمى إنت
يا للى شارب دم ياسين
و انت بتكبر و تقرا م
الآيات سورة ياسين
روح هناك ابعد بعيد
دول ايديك متلوثين
بدم ابنى اختى و بنتى
حتى جارتى و بنيامين
كل واحد فينا يدعى يرد
أخوه و يقول آمين
انتو مين