دم ودم/ شعر : الشاعر أيمن اسماعيل جمهورية مصر العربية

بدر منور كان الواد
عمال يجرى ويكتفى
يمسك حجره
يشد النبله
يقوم بركان
ولعه وآدها
يضرب حبه
يهرب حبه
ورصاصة طايشة
ورصاصه جايه
يجرى ويعرج
وقع الواد

وأنا قاعد زى خيال ح أتجن
بتفرج
عيال خايبه
تلعب كوره
تحرق دمى
إرفع يا بنى
مين ح يقابل
إلحق أجرى
وطاشت كوره
فوق العارضه
حاول تانى
ووقع الواد
لكن قام
يجرى ويتدارى
فى ركن الحيطة
وجريوا وراه
كام دبابه
ودمه بينزف
وجول بيضيع
وكفايه حرام
تحرق دمى
ودمه بينزف
دم يعطر
دم يخضر
خَلَّى الأرض
تقول ياسلام
وقع لعيب
نزل دكتور
حوشوا الدم
ودمه بينزف
والتانى شاط البلن
بره العارضه
يا بنى أرحمنى
يخرب بيتكوا
ولسه بيجرى
يهرب حبه
ويضرب حبه
وبيتدارى وبيتكفى
مش هامه رصاص
وعساكر ددبان
بتدور على عيل
مش زى عيالنا
لو ينجرح منهم واد
تقوم الدنيا
أم تطبطب
وأب يدادى
ودلع حبه
وشويه شوربه
وكام دكتور
لكنه عيل
خَلَّى عقول تتجنن
وانا قاعد
زى خيال ح أتجن
وشوية عيال حرقوا الدم
وزى العادة عيال خايبه
والواد يضوى ويلمع
زى الماس
والنار حواليه
وخلص الماتش
دمى إتصفى
ودمه إتصفى
لكن دمه
خَلَّى الأرض
تقول يا سلام
دم معطر دم يخضر
دم شهيد

عن محمد صوالحة

من مواليد ديرعلا ( الصوالحة) صدر له : كتاب مذكرات مجنون في مدن مجنونة عام 2018 كتاب كلمات مبتورة عام 2019 مؤسس ورئيس تحرير موقع آفاق حرة الثقافي .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: Content is protected !!