آفاق حرة للثقافة صحيفة ثقافية اجتماعية الكترونية
وشوش صفره
وشّداني
علي دوامه وخّداني
بتبِهِر عقلي وتفاخر
عيوني الواسعه مفتوحه
علي الآخــــــــــــــــــــــر
وطول الوقت باسأل روحي ..
ياروحي قولي لي أنا فين؟
سمعت الفجر بّيأدن
وشُفت الكعبه جوه فانوس
غناوي وحوي ياوحوي
تلّف بنورها
ياجماعة أنا مهووس!
أبُص شمالي ويميني
وشوش صفــــــــــره
وكف إيديها بسكوته
تبيع لي وهييّ مبسوطه
وكان قلبي يُدق
بلهفه عالمصروف
ترجّع لي كتير باقي
يطير الخـــــــــــــــوف
وتسألني ..
جاوبني بُسرعه ناقصك إيه؟
بأرخص سعر أصّدرلك
وإمتي وفين؟
يانايم لسه علي حالك
يانور العيـــــــــــــن
وشوش صفره
عينيها من وتر مشدود
تشّد الحيل مّكن وخيوط
عمل وكفاح
أمل بُركان بألف جناح
وحتصّدر شعاع لصباح
وتتصّدرعلي العالم
خطوط إنتاج
تغّرقنا في بحر الجات
وتضحك ِمّنا تّدينا
طُبل وصاجات
إيدين بسكوته
بتطّير رقابي الفقر
وتعلا فووووق
ُتبّص لنا بنظرة صقر
فأرجع أفتكر تاني
وأسأل روحي..
ياروحي قوليلي أنا فين؟
يرد النخل من بلدي
ياحبة عيني ياولدي
يا مروي من حلاوة النيل
نسيتني خلاص؟
وإنتي كمان نسيتيني
وصّدرتيني للصيني
عشان أزرع كبد صيني
رخيص سعرُه هايحييني
وباحلف لك ياهبة النيل
هاييجي الدور عليكي يميل
تلاقي النيل هجر ّطميك
هرب منك
بقى مراية
وشوش صفره
